Балкон дээрээ гарч байгаад л хүний толгой дээрээс ус шиднэ, шүлсээ хаяад л далд орчихно. Зуны халуун өдөр дээрээсээ ус асгуулсан хүн бол тоохгүй, харин өвлийн хар хүйтэнд усаар юүлүлсэн хүмүүс хараалаа барж гүйцнэ. Заримд нь баригдна. Тэгээд л ээждээ нүдүүлнэ дээ.

За тэр ч гайгүй дээ. Миний хийж байсан террорист үйлдлүүдээс хамгийн жигшүүртэй нь 5 давхрын чардаак дээрээс муужгай шидэж байсан явдал. Одоо бодохоор дотор муухайрах ч шиг. Гайхал муужгай газарт заавал дөрвөн хөллөж буугаад болдоггүй. Тэхээр нь нөгөө муужгайгаа барьж аваад 4 хөлийг нь сайн гэгч нь баглаж хүлээд л шидчихнэ. Нам!

Би гурван настайдаа анх ТВ-ээр гарсан гэдгийм. Замын хажууд зогсоод машин руу чулуу шидэж байтал Монгол ТВ-ийн камер хажууд бичлэг хийж байсан нь таарчихгүй юу.

Шал заваан жаал байсаан. Бөглөө түүнэ. Хуруу болгондоо үү ургуулчаад л шал тоохгүй давхиж явдаг байлаа шд. Хэ хэ. Тэвэг өшиглөнө. Тэвгийг бол ч харин угсрана, өсгийдөнө, өлмийдөнө, салтаадна, үхэрдэнэ, нэг дор 500-г өлхөөн өшиглөчихдөг догь тэвэгчин явлаа. Харин бөөр хааяа өвддөг болсон шалтгаан нь энэ байж магадгүй.

Хажуугийн 96-р байрныхантай байнга чулуугаар байлддаг байсийм. Харамсалтай нь дандаа ялагдана. 96-ынхан аймаар том том нохойтой. Биднийг бүр орцондоо ортол туулгадаг байсийм даа. Дараа нь 9 сарын 1-нд 96-гийн чулуун дайны баатар, заналт дайсан болох Жавхаа гэдэг бандитай нэг ангид хамт орчихдог юм. Над руу чинь хялалзаж долилзоод л, би ч мөчөөгөө өгөхгүй кармаандаа гар зангидаастай. Гэхдээ удалгүй сайхан найзууд болсоон.

Байшингийн гадуурхи ТҮЦ-нүүд дээгүүр харайж эр зоригоо шалгадаг, шаариган дугуйтай Санкийт хэмээх түрдэг машин хийж уралддаг, хааяа гол явж загас барьдаг. Загас барих ч гэж дээ. Ганц хоёр жараахай барьсан болоод л түүнийгээ буцаагаад шидчихдэг байсан. Ещё том загас бариулаарай гэж. Даанч дахиад л жараахай баригдана.

Би ерээд оны шилжилтийн ороо бусгаа цагийн хүүхэд. Мөнгөтөй л болвол ТҮЦ рүү напелеон, дугуй еэвэн хоёрт гүйнэ. Нээрээ манай ангийн Ганзориг гэртээ үнэхээр сайхан гамбир хайрдаг байсныг санаж байна. Хөвгүүд хичээлээ тараад л тэднийд очино. Хүн бүхэн ээлжилж гурил зуурч  элдээд л, гамбир хайраад л, утаа май тавьж, ханиалгаж, хахаж цацаад л янзын гоё.