-Тийм ээ, би ингэж хэлсэн нь үнэн. Гэхдээ Жанлавын яриад байгаа шиг зүйлийн талаар яриагүй. Энэ бүхэн аль хэдийнэ Дорнодын телевиз, ИТХ дээр яригдаад олонд ил болсон асуудлууд. Жанлав дарга өөрийнхөө завааруулсан юманд намайг татан оролцуулж байгаа хэрэг гэж л хэлмээр байна.

-Аймгаасаа сонгогдсон гишүүнтэйгээ Засаг дарга нь ингэтлээ таарамжгүй байдалд хүрнэ гэж баймааргүй санагдах юм.
-Түүний талаар Дорнодын ард түмэн, сонгогчид, удирдлагад нь байдаг хүмүүс хүртэл тойргоос сонгогдсон гишүүний хувиар надад хандаад байхад би дуугүй байж таарахгүй биз дээ. Тэгээд тэдний санаа бодлыг Ц.Жанлавт хэлье гэж бодоод л хэлсэн юм. Ард түмнийхээ үгийг сонсохгүй байгаа нөхөрт би хэлэх ч үүрэгтэй.

Хууль зөрчөөд, эрх мэдлээ хэтрүүлээд, албан тушаалаа өөртөө ашигтайгаар урвуулан ашиглаад, төсвийг дур мэдэн зарцуулаад, татвараас зайлсхийгээд, өөрийн хяналтад байдаг аж ахуйн нэгждээ газар олгоод, хууль бусаар барилга бариулж хөрөнгө мөнгөнөөс нь завшаад, хутга шөвгө, хөрөнгө мөнгөний асуудалтай хүмүүсийг ажилд томилоод байна гэсэн гомдол олон хүнээс ирдэг юм. Хөдлөшгүй баримттайгаар яриад байдаг. Түүнийг нь хэлсэн чинь хүлээж авах маяггүй шүү. Тэгэхээр нь "Пянгаа өөрөө даагаарай” гэчихсэн юм. Нэг их буруу үг гэж бодохгүй байгаа шүү.

-АТГ-т шалгуулж байна гэхээс эхлээд сүүлийн үед Жанлав даргын талаар хэвлэлээр таагүй мэдээлэл цөөнгүй гарч байгаа. Харин "захиалагч” нь та бололтой. Засаг дарга тань ингэж хэлсэн байсан...
-Тэр л бичүүлж байгаадаа гэж төсөөлөөд, түүндээ итгээд сэтгүүлчид, бас намайг гүтгэж болохгүй л дээ. Өөрийгөө буруугүй л гэж үзэж байгаа бол тэр бичсэн сониноо шүүхэд өгөх хэрэгтэй. Түүний юу ярьж яваа талаар би сонсож л байсан. Дуугүй байя гэж бодсон. Дараа энэ бүхний талаар дэлгэрэнгүй ярина гэж бодож байгаа.